هنغير الدستور .... وهنكشف المستور

هنغير الدستور
هنغير الدستور
و هنكشف المستور
و نزحلق الأمور
و نقول له يللا غور
عايزين ندوق الوز
أرحل فارقنا يا عز
ماحناش وباء و لا لغز
و الحال بطاله و عجز
أما أنت يا عم لطيف
قال آيه أسمك نظيف
مش لاقيين الرغيف
و بقينا ننام خفيف
و يا عينى عليك يا سرور
دايما فرحان مسرور
بتعذبنا و مبهور
و بتكدب ف المنشور
هنغير الدستور
و هنكشف المستور
و نزحلق الأمور
و نقول له يللا غور
يا سلام بقى ع الأعلام
بقى هلس و كله تمام
بيعلمنا الأجرام
و يثبتنا و بننام
و يا عينى عليكى يا ثقافة
و يا فاروق زدتى لطافه
جهلنا آخر أيافه
وعينا كله نظافة
و اسم الله بقى عالشرطه
دى يوماتى بتقسم تورته
من شلاتين حتى زفته
و الظلم فى كل حته
هنغير الدستور
و هنكشف المستور
و نزحلق الأمور
و نقول له يللا غور
أما الأستاذ آمين
دايما نصاب متين
بيقلب العايشين
فى كل الميادين
و الوسطه بقت الأسطه
شغاله أجدع من البوسطه
و اللى مالوش أى ظبطه
يبقى ضاع فى الأونطه
و أن كنت بتاع رشاوى
أجدع من أى حاوى
راح تخلص من البلاوى
تتصيت كالغناوى
هنغير الدستور
و هنكشف المستور
و نزحلق الأمور
و نقول له يللا غور
و إن كنت بقى غلبان
هيسموك الجبان
و يصدوك عالبيبان
و هيكلوك كالغيلان
شفتوا إذاى الحرامى
بيسموه إعتصامى
و يعدوه عالأسامى
و يحبوه زى مامى
و الـتَـعبان الفقير
أصبح تـِـعبان حقير
علشان عايز يسير
بقى معدوم م الضمير
هنغير الدستور
و هنكشف المستور
و نزحلق الأمور
و نقول له يللا غور
أما الغيط و المزارع
بقوا بور من غير موانع
سرقوا الرى اللى طالع
شربوا المطر اللى ناشع
و إن رحنا عالطرقات
هنموت من الأشارات
نتذنب بالساعات
و تدغدغنا مطبات
و الجامعة زى صانعة
القيمة فيها ضايعة
بلوزات شفافه مايعه
و شيتات نازله و طالعه
هنغير الدستور
و هنكشف المستور
و نزحلق الأمور
و نقول له يللا غور
و إن رحنا عالقهاوى
دى بلاد أصل الغناوى
بتجمع كل غاوى
يشكوا و يحكوا ف بلاوى
و الصينى ف ننى عينى
أصبح زادى و طينى
يا صناعتى ودعينى
يا بضاعتى شيعينى
هنغير الدستور
و هنكشف المستور
و نزحلق الأمور
و نقول له يللا غور