بعثــات

يافندى ياللى ابوك بعتك تتعلم طب
وسايب العلم وداير تعشق وتحب
سبع سنين فاتت وانت تغطس ماتقب
خليت ابوك من مصروفك يكفر ويسب
سيبك بقه من دى الغربه وارجع بيع لب
وان شفت فى مصر بطاله اقعد بطال
دى مصر عايزه رجاله مش عايزه عيال

محضرتك ياللى بتدرس فى اوروبا حقوق
بتعط من قهوه لقهوه سكران ماتفوق
ان كان قانونك يسكت لك ده قانون محروق
وابوك اللى جابك من صلبه ما خد الا خازوق
رجعت له بفرق وقصه وشنب محلوق
وتنجعص له فى الصاله تقرا الجورنال
دى مصر عايزه رجاله مش عايزه عيال

اما اسمه ايه اللى فالقنى وعامللى عظيم
قال فى الزراعه بيتعلم علم التطعيم
يقول لى طعم التين يشبه طعم البرسيم
تقول اذا شفت احواله ياخسارة المال
دى مصر عايزه رجاله مش عايزه عيال